• Дэлхийн брэнд Fairtex Mongolia-гийн нэрэмжит “Fairtex Cup 2026” холимог тулааны нээлттэй тэмцээн торгүй дүрмээр 03-р сарын 28-29-ний өдрүүдэд зохион байгуулагдаж нийт 20 байгууллагын 200 гаруй тамирчид өсвөр үе, насанд хүрэгчдийн ангиллаар өрсөлдөн шилдгүүдээ тодрууллаа. Тэмцээний нээлтийн арга хэмжээнд Монголын Холимог Тулааны Холбооны ЕНБД Г.Дашдаваа, Fairtex Mongolia брэндийн захирал Г.Батхүү болон бусад хүндэт зочид оролцож баг тамирчдад амжилт хүслээ. “Fairtex Cup 2026” тэмцээний Өсвөр үеийн эрэгтэй шилдэг тамирчнаар 14-15 насны -65 кг-д өрсөлдсөн Э.Хаш-Эрдэнэ (Эрдэнэ клуб), эмэгтэй шилдэг тамирчнаар 16-17 насны -65 кг-ын тамирчин Т.Цэрэнханд (Гурван бүсийн холимог тулаанчдын холбоо) нар тодорсон юм. Харин Насанд хүрэгчдийн эрэгтэй шилдэг тамирчнаар -77 кг-ын аварга У.Батзориг (One Team & Ширэн бээлий), эмэгтэй шилдэг тамирчнаар -60 кг-д алтан медаль хүртсэн ОУХМ Б.Алтанчимэг (One Team) тодорч шилдэг тамирчны цом болон Fairtex Mongolia брэндийн бэлгийг гардан авлаа.

Багийн нэгдсэн дүнгээр Өсвөр үеийн ангилалд Nalaikh Team тэргүүн байр, “Десант бамбар” клуб дэд байр, Batu Fighters гутгаар байрыг эзэлсэн бол Насанд хүрэгчдийн ангилалд багийн дүнг One Team Fighting Center клуб тэргүүлж, ШИРЭН БЭЭЛИЙ бокс, кикбокс, ММА клуб болон HERO figthing club багууд удааллаа. Мөн “БИ БОЛ ХОЛИМОГ ТУЛААНЧ” reel бичлэгийн уралдааны ялагчаар ОУХМ Б.Алтанчимэг тодорч “Fairtex Mongolia” брэндийн нэрэмжит бэлгийг гардан авсан. Энэхүү тэмцээний 14-15, 16-17 болон насанд хүрэгчдийн ангиллын шилдэг болсон тамирчид ирэх 05-р сард Узбекистан улсын нийслэл Ташкент хотод зохион байгуулагдах Азийн аваргын тэмцээнд эх орноо төлөөлөн оролцох эрхтэй болж байгаа юм. Тэмцээнийг хамтран зохион байгуулсан Fairtex Mongolia брэнд болон Mungunguur hospital Мөнгөн гүүр эмнэлэг, УСУГ-ын Чандмань спорт цогцолборын хамт олонд гүн талархлыг илэрхийлье!

МОНГОЛЫН ХОЛИМОГ ТУЛААНЫ ХОЛБОО “ХАМТДАА БИД ЧАДНА” – “TOGETHER WE CAN”